Hetimet e SPAK për pasuritë e ish-zëvendëskryeministres dhe deputetes së Partisë Socialiste, Belinda Balluku, duket se janë shtrirë edhe përtej territorit shqiptar.
Sipas informacioneve të publikuara nga Alfapress.al, prokurorët që po hetojnë çështjen, në bashkëpunim me homologët italianë, dyshohet se kanë identifikuar një tjetër pasuri luksoze në Itali. Bëhet fjalë për një vilë në Sardenjë, në një prej zonave më ekskluzive të bregdetit italian.
Sipas këtij raportimi, vila dyshohet se lidhet me Ballukun, por pronësia e saj është kamufluar përmes regjistrimit në emër të personave të tjerë. Të dhënat për këtë pasuri, sipas burimeve të cituara nga media, janë pjesë e verifikimeve që po kryhen në bashkëpunim me autoritetet italiane.
Hetimet për pasuritë e ish-zëvendëskryeministres raportohet se janë shtrirë në disa vende europiane, ndërsa autoritetet shqiptare po bashkëpunojnë me institucionet homologe për identifikimin dhe verifikimin e aseteve që dyshohet se mund të jenë fshehur përmes personave të tretë.
Në Shqipëri, SPAK ka konfirmuar zyrtarisht sekuestrimin e dy vilave në zonën e Vlorës, në kuadër të hetimeve.
Njëra prej tyre ndodhet në kompleksin “White Rocks”, në Dhërmi, dhe rezulton e regjistruar formalisht në emër të ish-futbollistit Igli Tare.
Pas hetimeve, SPAK ka identifikuar dhe sekuestruar edhe një tjetër pronë në Palasë, të përshkruar si “Vila familjare 2F nr.188/1”. Pasuritë janë vënë nën sekuestro në kuadër të hetimeve për korrupsion pasiv dhe pastrim parash.
Ndërkohë, pak ditë më parë, gazetarja Anduena Llabani raportoi për një tjetër vilë luksoze në Dibër, e cila, sipas saj, dyshohet nga SPAK se lidhet me Belinda Ballukun dhe se edhe kjo pronë mund të jetë regjistruar në emër të personave të tjerë.
Nëse konfirmohet edhe pasuria në Sardenjë, hetimi do të merrte një tjetër dimension ndërkombëtar, duke zgjeruar hartën e aseteve që autoritetet po verifikojnë në kuadër të procedimit ndaj Ballukut.
Deri në një konfirmim zyrtar nga SPAK ose autoritetet italiane, informacioni për vilën në Sardenjë mbetet në nivelin e raportimit mediatik dhe nuk mund të konsiderohet si fakt i provuar.
/Alfapress.al
