Vetëm pak ditë pas vizitës në Hagë, ku zhvilloi takime në kuadër të bashkëpunimit me strukturat europiane të zbatimit të ligjit, Drejtori i Përgjithshëm i Policisë së Shtetit, Skënder Hita, pritet të udhëtojë drejt Kinës, raporton EPOST
Hita do të marrë pjesë në Sesionin e 94-t të Asamblesë së Përgjithshme të INTERPOL-it, që do të zhvillohet nga 30 nëntori deri më 3 dhjetor 2026 në Hong Kong.
Asambleja e Përgjithshme e INTERPOL-it është një prej aktiviteteve më të rëndësishme të organizatës dhe mbledh drejtuesit e policive dhe zyrtarë të lartë të zbatimit të ligjit nga 196 vendet anëtare.
Në fokus të këtij aktiviteti do të jenë sfidat globale të sigurisë, forcimi i shkëmbimit të informacionit dhe intensifikimi i bashkëpunimit ndërkombëtar kundër krimit ndërkufitar.
Pjesëmarrja e kreut të Policisë së Shtetit në këtë forum vjen vetëm pak ditë pas angazhimeve në Hagë me strukturat europiane të sigurisë dhe zbatimit të ligjit, duke e vendosur bashkëpunimin ndërkombëtar në një prej drejtimeve kryesore të agjendës së Policisë së Shtetit.
Nga Europa në Azi, Hita pritet të përfaqësojë Policinë e Shtetit në një tryezë ku do të jenë të pranishëm drejtues të lartë të policive nga e gjithë bota shkruan EPOST
Takimi në Hong Kong do të shërbejë gjithashtu si një mundësi për kontakte dypalëshe me homologë të vendeve të ndryshme dhe për forcimin e mekanizmave të bashkëpunimit policor ndërkombëtar.
Pas vizitës në Hagë, pjesëmarrja në Asamblenë e INTERPOL-it në Hong Kong shënon një tjetër angazhim ndërkombëtar të kreut të Policisë së Shtetit në harkun e pak javëve.
