Kryeministri Edi Rama ka komentuar përplasjen institucionale të krijuar pas kërkesës së SPAK për pezullimin nga detyra të zëvendëskryeministres dhe ministres së Infrastrukturës, Belinda Balluku, duke e cilësuar vendimin si një masë “absurde” dhe të paprecedentë.
Gjatë intervistës me gazetaren Rudina Xhunga në podcastin “Flasim”, Rama këmbënguli se çështja nuk duhet parë si një përplasje personale mes tij dhe Prokurorisë së Posaçme. Sipas tij, ajo që është vënë në pikëpyetje në këtë rast është vetë ndarja e pushteteve dhe kompetencat që përcakton Kushtetuta.
“Në rastin e Belinda Ballukut u faturua shumë keq një gjë tjetër që nuk kishte lidhje me të. U prodhua një masë absurde, e pandodhur në historinë e botës: pezullimi i ministrit nga detyra”, deklaroi Rama.
Kryeministri argumentoi se institucionet e drejtësisë kanë pavarësi për të hetuar dhe për të vendosur sanksione kur konstatohet shkelje e ligjit, por, sipas tij, kjo pavarësi nuk nënkupton të drejtën për të ushtruar kompetenca që i takojnë institucioneve politike.
“Nuk u sfidova unë. U sfidua Kushtetuta e Republikës së Shqipërisë dhe u sfidua një pushtet i pavarur”, tha Rama, duke shtuar se si qeveria ashtu edhe organet e drejtësisë janë të pavarura në ushtrimin e kompetencave të tyre, por brenda kufijve të përcaktuar nga ligji.
Sipas kreut të qeverisë, nëse SPAK do të kishte kompetencën për të pezulluar ministrat, do të krijohej një precedent që do të ndryshonte raportin mes institucioneve dhe do të dëmtonte, sipas tij, sistemin që po ndërtohet në vend.
“Nëse do t’u jepej prokurorëve e drejta të pezullonin ministrat, do të orvatej SPAK-u, do të prishej gjithë ajo që po mundohemi të ndërtojmë”, u shpreh Rama.
Ai pretendoi se me kërkesën për pezullimin e Ballukut, SPAK ka hyrë në një fushë që, sipas tij, prek kompetencat e kryeministrit, Kuvendit dhe Presidentit.
“SPAK-u hyri në territorin tim si kryeministër dhe në territorin tonë si shumicë parlamentare që ka votuar qeverinë dhe në territorin e Presidentit që ka dekretuar ministrat. Pra nuk ka lidhje me personin”, deklaroi Rama.
Kryeministri theksoi se i njëjti qëndrim do të mbahej prej tij edhe nëse një kërkesë e tillë do të kishte të bënte me një ministër tjetër të qeverisë.
“Çdo ministër, nëse do të pezullohej, unë do të mbaja po atë qëndrim”, tha Rama.