Një 30-vjeçar nga Thumana, me precedentë të theksuar penalë, është arrestuar nga Policia e Tiranës pasi u kap i armatosur në zonën e Bllokut. Bëhet fjalë për Petrit Shimën, i cili u vu në pranga së bashku me 25-vjeçarin Redion Hymeri, të dënuar më parë në Angli me 1 vit burg për posedim të lëndëve narkotike.
Sipas burimeve, dy të rinjtë ishin prej ditësh nën monitorimin e Policisë, pas informacioneve të siguruara në rrugë operative. Ata dyshohet se kishin udhëtuar të armatosur nga Kruja drejt Tiranës, ku fillimisht janë ndalur në zonën e Bllokut dhe më pas janë larguar me taksi.
Ndërhyrja e efektivëve është bërë në rrugën “Sami Frashëri”, ku është ndaluar taksia me të cilën po udhëtonin dy të rinjtë. Gjatë kontrollit, Petrit Shimës i është gjetur një pistoletë me 15 fishekë, të cilën e mbante pa leje. Por arrestimi i tij nuk ka qenë aspak i qetë.
Pas ndalimit të taksisë, Shima ka bërë rezistencë ndaj punonjësve të Policisë, duke kundërshtuar veprimet e tyre. Situata ka vijuar të përshkallëzohet edhe pasi 30-vjeçari është shoqëruar në ambientet e Komisariatit nr. 2. Burimet bëjnë me dije se, pasi është futur në dhomat e shoqërimit, Petrit Shima ka shkaktuar dëme dhe ka shkatërruar ambientet e tyre.
Për neutralizimin e tij është dashur ndërhyrja e forcave “Shqiponja”, të cilat kanë vënë situatën nën kontroll. Edhe 25-vjeçari Redion Hymeri ka kundërshtuar dhe goditur punonjësit e Policisë gjatë veprimeve procedurale. Ai akuzohet gjithashtu për moskallëzim të krimit, pasi udhëtonte në të njëjtin automjet me personin që posedonte armën.
