Deputeti Erion Braçe në një qëndrim të gjatë të bërë sot në rrjetet sociale, sqaroi arsyet se pse ndryshoi votën e tij për Reformën Territoriale, dhe foli për një plan të poshtër brenda partisë, duke u shprehur se kartoni i tij nuk ishte i domosdoshëm për të arritur numrat që duheshin.
Në një moment gjatë qëndrimit të tij, pasi akuzoi Ramën se nuk ndan pushtetin, dhe e vizaton Partinë dhe Reformat pa u konsultuar me grupin, Braçe tha se ka prishur një plan të poshtër brenda Partisë, ndërsa etiketoi dhe emrin Nesti, që ishte personi që do të bënte dhe numërimin e votave.
Në një lexim të thjeshtë, Nesti është një person që është marrë drejtpërsërdrejti me Reformën Territoriale, dhe burime i thanë Shekullit se sulmi i Braçes i drejtohej pikërisht Arbjan Maznikut, bashkëkryetarit të komisionit të posaçëm për Territorialen. Duket se Braçe ka hapur një skenar me qitje të largët, duke nënkuptuar indirekt se Mazniku mund të ketë qenë dhe personi që ka dekonspiruar Erjon Veliajn, kryebashkiakun e arrestur të Tiranës.
Denoncimet e para për Veliajn në SPAK, u bënë nga një person që u identifikua si Nesti Angoni, i cili nuk u arrit kurrë që të gjendej fizikisht, megjithatë gjatë rrugës, prokurorët gjetën prova të mjaftueshme që çuan në arrestimin e kryebashkiakut, tashmë prej afro 20 muajsh.
Ndërkohë që sa i takon votës së 84, mbetet e paqartë nëse Braçe i referohet Elisa Spiropalit, e cila gjithashtu shprehu rezerva për Reformën, megjithëse ngriti kartonin jeshil, apo Belinda Ballukut, që mbërriti në sekondat e fundit në Kuvend, përpara se të niste dhe procesi i votimit.
“Unë votova që të mos iki, por të qëndroj, të bëj punën dhe gjithkush që e njeh këtë punë e di fort mirë se kjo punë e tillë është, e varur nga vota e shumicës, e rëndë si e tillë, të rrëzon, të thyen, të bën copash aq sa nuk merr dot frymë, por unë e kam pranuar këtë punë e nuk bëj dot pas, e kam të ndaluar të bëj pas. Nuk di në keni parë tjetër që të sulmohet e të qëndrojë, të linçohet e të rrijë përballë, t’i shkojnë atje ku jeton e atje ku punon, po bën punën dhe të dëgjojë e përgjigjet, me kosto shumë të madhe personale e familjare; keni parë? Ndaj vendosa të rri dhe të bëj punën. E di që kam prishur një plan që politika e ka të sajin, të brendshëm, të poshtër, por nuk mund të bëj pa të, ndaj për Nesti numëruesin dhe numëruesit e tjerë unë jam 85-a, 84-a ishte aty për planin”-, thotë Braçe.
