Një banesë në fshatin Shelegar të Sarandës është grabitur gjatë natës, ndërsa familjarët ndodheshin në një dasmë. Hajdutët kanë shfrytëzuar mungesën e tyre për të hyrë në shtëpi dhe për të marrë një shumë të konsiderueshme parash dhe bizhuteri.
Sipas familjarëve, nga banesa e Mejdi Tushës janë marrë rreth 15 milionë lekë të vjetra, si dhe disa bizhuteri me vlerë.
Ngjarja është konstatuar pasi një prej familjarëve është kthyer në banesë dhe ka gjetur dhomat të përmbysura. Dyshohet se autorët kishin shfrytëzuar pikërisht faktin që shtëpia ishte bosh, pasi të gjithë pjesëtarët e familjes ishin larguar për të marrë pjesë në dasmën e një të afërmi.
Nga hetimet paraprake dyshohet se në grabitje kanë marrë pjesë dy persona. Ata mund të kenë vëzhguar më herët lëvizjet e familjarëve dhe kanë pritur momentin kur banesa ka mbetur pa njeri.
Për të shmangur identifikimin, autorët dyshohet se kanë dëmtuar kamerën e sigurisë së vendosur në banesë dhe më pas kanë hyrë brenda.
Pas denoncimit, në vendngjarje kanë shkuar shërbimet e Policisë së Sarandës dhe grupi hetimor. Specialistët kanë nisur këqyrjen e banesës dhe mbledhjen e provave që mund të ndihmojnë në identifikimin e autorëve.