Akademia e Sigurisë pritet të përfitojë nga eksperienca e dy prej drejtuesve më të njohur të Policisë së Shtetit. Pas përfundimit të mandateve të tyre në krye të departamenteve që drejtonin, Neritan Nallbati dhe Pëllumb Seferi do t’i bashkohen Akademisë së Sigurisë, ku pritet të kontribuojnë në formimin e brezit të ri të punonjësve të policisë.
Nallbati, i cili drejtoi Departamentin e Policisë Kriminale, dhe Seferi, që ishte në krye të Departamentit të Marrëdhënieve Ndërkombëtare, sjellin me vete një eksperiencë të gjatë në drejtimin e strukturave policore, hetimin kriminal, bashkëpunimin ndërkombëtar dhe menaxhimin operacional.
Ndërkohë, në kuadër të riorganizimit të strukturave drejtuese të Policisë së Shtetit, në vend të Pëllumb Seferit është komanduar Artan Bajraktari, ndërsa drejtimin e Departamentit të Policisë Kriminale e ka marrë Arjan Muça. Në ditët në vijim priten edhe emërime të tjera në kupolën drejtuese të institucionit.