Dokumentet zyrtare që hedhin dritë mbi organizimin e protestës së 21 janarit 2011 zbulojnë edhe komunikimet mes Policisë së Shtetit dhe Partisë Socialiste në ditët para demonstratës. Sipas shkresave, Policia e Tiranës i kishte kërkuar zyrtarisht kryetarit të atëhershëm të PS-së, Edi Rama, të njoftonte me shkrim organizimin e tubimit, pasi deri në atë moment nuk ishte depozituar njoftimi përkatës.
Përmes shkresës nr. 430/6, datë 19 janar 2011, Drejtoria e Policisë së Qarkut Tiranë iu drejtua Ramës, duke i kërkuar respektimin e procedurave të parashikuara në ligjin për tubimet. Kërkesa vinte pas informacioneve të publikuara në media dhe të dhënave që dispononin strukturat e Policisë së Shtetit për organizimin e një demonstrate nga Partia Socialiste.
Në përgjigje, Partia Socialiste depozitoi të njëjtën ditë shkresën nr. 2, me objekt “Njoftim për tubim”, ku bënte me dije se më 21 janar do të zhvillohej një demonstratë popullore paqësore, me pjesëmarrjen e mijëra simpatizantëve.
Por njoftimi nuk u konsiderua i plotë nga Policia e Tiranës. Përmes një tjetër komunikimi, autoritetet ia kthyen dokumentacionin organizatorëve për plotësim, duke evidentuar mungesën e disa elementeve që, sipas tyre, kërkoheshin nga ligji për tubimet shkruan EPOST
Konkretisht, Policia kërkonte përcaktimin e drejtuesit të demonstratës dhe ndihmësve të tij, të cilët duhej të pajiseshin me shenja dalluese për të garantuar mbarëvajtjen e protestës. Po ashtu, kërkohej përcaktimi i orës së përfundimit të tubimit dhe itinerarit që do të ndiqej, në mënyrë që strukturat policore të planifikonin masat e sigurisë dhe rendit publik.
Ndërkohë, edhe Asambleja e Partisë Socialiste, Dega Tiranë, kishte depozituar më 19 janar një tjetër shkresë, me numër 3 dhe objekt “Njoftim për tubim”, për zhvillimin e demonstratës së 21 janarit. Por edhe ky dokument, sipas vlerësimit të Drejtorisë së Policisë së Qarkut Tiranë, nuk përmbushte kërkesat ligjore.
Sipas EPOST shkresat dokumentojnë përplasjen procedurale mes Policisë dhe organizatorëve të protestës vetëm dy ditë përpara demonstratës së 21 janarit, duke treguar se institucionet kishin kërkuar plotësimin e detyrimeve ligjore për njoftimin dhe organizimin e tubimit.
©Copyright EPOST
Ky artikull është ekskluziv i EPOST, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar EPOST dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016
