Bankers Petroleum shpreh gatishmërinë për të zbatuar vendimin e Arbitrazhit, pas arrestimeve të drejtuesve të saj në Shqipëri
Kompania kineze Bankers Petroleum Albania, e cila zotëron me koncesion shfrytëzimin e vendburimit të naftës në Patos-Marinzë, ka deklaruar se është e gatshme të bashkëpunojë me qeverinë shqiptare për zbatimin e vendimit të Gjykatës Ndërkombëtare të Arbitrazhit të datës 7 qershor 2024, i konfirmuar më pas edhe nga Gjykata e Apelit e Shqipërisë në korrik 2025. Deklarata vjen në një moment të tensionuar për kompaninë, pas arrestimit të 10 personave, mes tyre CEO aktual, Hong Ping Xiao, dhe ish-drejtuesi Leonidha Çobo, të dy të akuzuar për evazion fiskal dhe mashtrime financiare.
Në deklaratën zyrtare për mediat, kompania shprehet se ekipet e saj ligjore janë të përgatitura të bashkëpunojnë me institucionet shqiptare për zbatimin e vendimit arbitral, i cili lidhet me mosnjohjen e 236 milionë dollarëve si shpenzime të justifikuara gjatë periudhës 2012–2017. Ky vendim ka pasoja të drejtpërdrejta në rrafshin fiskal, pasi ndryshon balancën e fitimeve të kompanisë dhe detyron atë të paguajë 50 për qind tatim mbi fitimin, në përputhje me kontratën koncesionare.
Sipas Prokurorisë, deri në fund të vitit të kaluar, Bankers raportonte një bilanc negativ prej 117 milionë eurosh, por vendimi i Arbitrazhit e ndryshon këtë situatë, duke e nxjerrë kompaninë me fitim kumulativ dhe duke hapur rrugën për tatimin mbi fitimin. Megjithatë, pavarësisht se ka kaluar më shumë se një vit nga vendimi, palët nuk kanë rakorduar ende detyrimet përkatëse.
Kompania deklaron se po ndjek me “vëmendje të sinqertë” hetimet penale të nisura më 2 korrik 2025 dhe angazhohet për bashkëpunim të plotë me autoritetet shqiptare. Ajo gjithashtu njofton krijimin e një ekipi të jashtëm për vetë-hetim të brendshëm, me qëllim ndriçimin e çështjeve të ngritura.
Në vijim të deklaratës, Bankers shpreh përkushtimin ndaj vizionit “Shqipëria 2030” dhe njofton plane për investime të reja në teknologji termale të avancuar, që synojnë të përmirësojnë eficiencën e nxjerrjes së naftës dhe qëndrueshmërinë mjedisore. Kompania thekson se synon të kontribuojë në zhvillimin ekonomik të Shqipërisë duke ruajtur standardet ndërkombëtare dhe partneritetin strategjik me vendin.
“Ne e shohim veten jo vetëm si operator energjie, por si një partner të besuar në rrugëtimin e zhvillimit të Shqipërisë,” – përfundon deklarata.