Një mesazh i dyshimtë po qarkullon në emër të OTP Bank Albania, duke u kërkuar klientëve të përditësojnë të dhënat bankare përmes një linku të jashtëm. Mesazhi ngre dyshime të forta për një tentativë phishing.
Një SMS që pretendohet se është dërguar nga “OTPBank Albania | Shërbimi i Klientit” po përdoret për t’u bërë presion klientëve që të kryejnë një “verifikim” të llogarisë brenda 24 orëve.
Në mesazh thuhet se të dhënat e profilit bankar “kërkojnë përditësim periodik” dhe se, nëse verifikimi nuk kryhet, mund të kufizohen shërbimet online. Më pas, marrësit udhëzohen të klikojnë një adresë interneti që nuk përputhet me domenin zyrtar të OTP Bank Albania.
Mesazhi përmban edhe një ID dhe një afat kohor prej 24 orësh, elemente që mund të përdoren për t’i krijuar viktimës ndjesinë e urgjencës dhe për ta shtyrë të veprojë pa u menduar gjatë.