Topi me të cilin Diego Armando Maradona shënoi dy prej golave më të famshëm në historinë e futbollit, përfshirë të ashtuquajturën “Dora e Zotit” kundër Anglisë në Kupën e Botës 1986, është shitur në ankand për 3.35 milionë dollarë.
Bëhet fjalë për topin Adidas Azteca të përdorur në çerekfinalen e Botërorit të Meksikës, më 22 qershor 1986, kur Argjentina mundi Anglinë 2-1 dhe Maradona realizoi, brenda vetëm pak minutash, dy gola që mbetën në historinë e këtij sporti.
Sipas shtëpisë së ankandeve Heritage Auctions në Dallas, ekspertët e kanë identifikuar topin duke e krahasuar me fotografitë e realizuara gjatë ndeshjes. Ai u shit të shtunën për 3.35 milionë dollarë, një shumë e konsiderueshme, por shumë më e ulët se vlerësimi prej të paktën 10 milionë dollarësh që ishte bërë përpara ankandit.
Goli i parë i Maradonës në atë ndeshje u shënua në minutën e 51-të. Kapiteni argjentinas u ngrit në ajër përballë portierit anglez Peter Shilton dhe e dërgoi topin në rrjetë duke e prekur me dorën e majtë, një ndërhyrje që nuk u konstatua nga gjyqtarët dhe goli u konsiderua i rregullt.
Pas ndeshjes, Maradona do të thoshte se goli ishte shënuar “pak me kokën e Maradonës dhe pak me dorën e Zotit”, duke i dhënë episodit emrin me të cilin vazhdon të njihet edhe katër dekada më vonë.
Vetëm katër minuta pas atij momenti kontrovers, Maradona realizoi një gol tjetër. Ai mori topin në gjysmën e fushës së Argjentinës, kaloi pesë futbollistë anglezë dhe më pas portierin Shilton, përpara se ta dërgonte topin në rrjetë. Aksioni u votua më vonë si “Goli i Shekullit” në historinë e Kupës së Botës.
Argjentina fitoi 2-1 dhe vazhdoi rrugën drejt titullit botëror, ndërsa ajo ndeshje u shndërrua në një prej kapitujve më të njohur të karrierës së Maradonës.
Topi kishte qëndruar për 36 vjet në pronësi të gjyqtarit tunizian Ali Bin Nasser, i cili drejtoi ndeshjen Argjentinë-Angli. Në vitin 2022 ai u shit në një ankand në Londër për 2 milionë paund, rreth 2.37 milionë dollarë, ndërsa shitja e fundit e ka çuar vlerën e tij në 3.35 milionë dollarë.
Megjithatë, topi nuk është objekti më i shtrenjtë i lidhur me atë ndeshje. Fanella që Maradona veshi kundër Anglisë u shit në vitin 2022 për afro 9.3 milionë dollarë.
Edhe rekordi për topin më të shtrenjtë të shitur ndonjëherë në një ankand sportiv mbetet më i lartë. Topi i goditjes së 50-të “home run” të yllit të bejsbollit Shohei Ohtani në sezonin historik të vitit 2024 u shit për 4.392 milionë dollarë.
Ndërsa rekordi absolut për një objekt sportiv në ankand mbahet nga fanella e New York Yankees që Babe Ruth veshi gjatë ndeshjes së tretë të World Series të vitit 1932. Heritage Auctions e shiti atë në vitin 2024 për 24.12 milionë dollarë.