Ajo që po ndodh në Sarandë nuk duket më thjesht si një incident i izoluar në një ambient nate. Përplasja pranë “Orange Club” po merr përmasa të tjera dhe po shndërrohet në një konflikt publik.
Gjithçka nisi pas një episodi të rëndë, ku, sipas pretendimeve të bëra për ngjarjen, Shefi i Krimeve i Komisariatit të Policisë Sarandë u përfshi në një konflikt teksa kishte ndërhyrë për të ndihmuar tre persona që po përplaseshin me bodigardët e lokalit. Pretendohet se gjatë ndërhyrjes ai është dhunuar.
Por ajo që ka ndodhur më pas është ajo që po ngre pikëpyetje.
Në vend që historia të mbetej vetëm te incidenti dhe përgjegjësit për të të përballeshin me hetimin, në skenë kanë dalë denoncime dhe akuza publike ndaj drejtuesve të Policisë së Sarandës nga pronari i “Orange”.
Dhe pyetja kryesore është e thjeshtë: pse tani?
Nëse ka pasur probleme me Policinë, pse këto pretendime nuk u bënë publike më herët? Pse nuk u denoncua situata përpara incidentit? Dhe pse pikërisht pas përplasjes ku u përfshinë bodigardët e lokalit dhe një drejtues i Policisë, nis një ofensivë publike kundër strukturave të Komisariatit?
Kjo nuk do të thotë se çdo akuzë ndaj Policisë duhet të hidhet poshtë. Përkundrazi. Nëse një drejtues apo punonjës policie ka shkelur ligjin, ka abuzuar me detyrën apo ka vepruar në kundërshtim me rregullat, duhet të hetohet dhe të mbajë përgjegjësi.
Por i njëjti standard duhet të vlejë për të gjithë.
Nëse ka pretendime për dhunë në ambientet e lokalit, ato duhet të verifikohen. Nëse ka denoncime për episode të përsëritura, institucionet duhet t’i marrin në shqyrtim. Dhe nëse ekzistojnë të dhëna apo kallëzime për veprimtari të paligjshme, përfshirë pretendime për shpërndarje narkotikësh, këto nuk mund të mbeten thjesht pjesë e debateve televizive apo deklaratave publike. Duhet të hetohen nga organet kompetente.
Në këtë histori, ajo që shqetëson është krijimi i përshtypjes së një përplasjeje në dy fronte: fillimisht një konflikt fizik me një drejtues të Policisë dhe më pas një betejë publike kundër vetë drejtuesve të Komisariatit.
A është kjo thjesht një përplasje e dy palëve që kanë versionet e tyre për ngjarjen?
Apo incidenti fizik ka sjellë edhe një kundërpërgjigje që tashmë po zhvillohet në terrenin mediatik?
Këtë nuk mund ta përcaktojë propaganda e asnjërës palë. Mund ta përcaktojnë vetëm faktet, provat dhe hetimi.
Policia duhet të jetë e para që kërkon transparencë kur ndaj saj ngrihen akuza. Por në të njëjtën kohë, autoriteti i Policisë nuk mund të dobësohet përmes presionit publik nëse pas tij fshihet një konflikt i krijuar nga një ngjarje konkrete.
Saranda nuk ka nevojë për një luftë deklaratash. Ka nevojë për një hetim të plotë.
Nëse ka shkelur ligjin Policia, përgjegjësit të ndëshkohen. Nëse kanë shkelur ligjin persona të lidhur me lokalin, edhe ata duhet të përgjigjen. Nëse ka pasur dhunë, ajo duhet të zbardhet. Nëse ka pasur presion apo intimidim ndaj Policisë, edhe kjo duhet të hetohet.