Një 64-vjeçar është arrestuar nga Policia e Tiranës pasi dyshohet se ka kanosur një grup xhirimi të televizionit Ora News, gjatë kohës që gazetarët po realizonin një kronikë në fshatin Zbarqë.
Ngjarja ndodhi gjatë realizimit të një kronike mbi problematikat me një burim uji. Gazetari, operatori dhe drejtuesi i automjetit kallëzuan në polici se ishin kanosur për jetën nga një shtetas që po kryente punime pranë burimit.
Pas kallëzimit, shërbimet e Komisariatit të Policisë Nr. 6 kanë ndërhyrë menjëherë dhe kanë bërë të mundur kapjen e 64-vjeçarit S. I., pak minuta më vonë, në një zonë malore të fshatit Zbarqë.
Gjatë kontrollit në banesën e tij, policia sekuestroi një armë gjahu pa leje, municion dhe një shufër metalike, të cilat dyshohet se i përkisnin 64-vjeçarit.
Ndërkohë, policia kishte nisur më herët procedim penal ndaj 70-vjeçarit R. P., për llogari të të cilit punonte i arrestuari. Ai dyshohet se kishte kryer punime pa leje për hapjen e një burimi uji dhe të një rruge, duke dëmtuar edhe rrjetin e ujitjes.
Ndaj tij është referuar procedimi për veprat penale “Shpërdorimi i tokës”, “Ndërtimi i paligjshëm” dhe “Shkatërrimi i rrjetit të ujitjes”.
Materialet procedurale për të dyja rastet i janë referuar Prokurorisë së Tiranës për veprime të mëtejshme.
Policia e Tiranës deklaron se do të vijojë bashkëpunimin me gazetarët dhe përfaqësuesit e medias, duke garantuar trajtimin e menjëhershëm të çdo rasti që cenon të drejtën e tyre për ushtrimin e detyrës.