Aksidentet rrugore në Shqipëri shënuan rritje gjatë shtatë muajve të parë të vitit 2026, duke u shtuar me rreth 10% krahasuar me të njëjtën periudhë të vitit të kaluar. Edhe muaji korrik regjistroi një numër më të lartë aksidentesh, sipas të dhënave të publikuara nga Instituti i Statistikave (INSTAT). Gjatë korrikut u regjistruan 165 aksidente rrugore, nga 131 në të njëjtin muaj të vitit 2025.
Numri i personave të vrarë ose të plagosur arriti në 235, krahasuar me 194 një vit më parë. Në periudhën janar–korrik 2026, në vend u regjistruan gjithsej 844 aksidente, kundrejt 767 në shtatëmujorin e parë të vitit 2025. Ndërkohë, numri i viktimave dhe të plagosurve arriti në 1,187 persona, nga 1,077 një vit më parë. Sipas INSTAT, sjellja e drejtuesve të mjeteve ishte shkaku kryesor i aksidenteve. Në korrik, 90.3% e rasteve ndodhën si pasojë e sjelljes së drejtuesve. Grupmosha 25–34 vjeç përbënte 21.8% të numrit total të aksidenteve të regjistruara.
Tirana vijoi të kryesojë listën e qarqeve për numrin e aksidenteve. Në korrik, në kryeqytet u regjistruan 59 aksidente, nga 37 në korrikun e vitit 2025. Si pasojë, 74 persona u vranë ose u plagosën. Në shtatë muajt e parë të vitit, Tirana regjistroi 336 aksidente, krahasuar me 219 në të njëjtën periudhë të vitit të kaluar.
Për sa i përket fashës orare, pjesa më e madhe e aksidenteve në korrik ndodhi gjatë intervalit 19:00–24:00, i cili përbënte 25.5% të totalit. Ndër ditët e javës, e enjtja regjistroi përqindjen më të lartë të aksidenteve, me 18.8%, ndërsa e marta kishte nivelin më të ulët, me 12.1%.