Një pajisje sinjalizuese e ngjashme me fenelinat e përdorura nga automjetet e Policisë së Shtetit është fotografuar e vendosur mbi xhamin e automjetit me të cilin lëviz deputetja e Partisë Socialiste, Ilva Gjuzi, në Tiranë.
Prania e kësaj pajisjeje në një automjet civil ngre pikëpyetje të forta mbi ligjshmërinë e mbajtjes dhe, veçanërisht, përdorimit të saj në rrugët publike.
Neni 175 i Kodit Rrugor rregullon përdorimin e sistemeve të posaçme të sinjalizimit dhe përcakton kategoritë e automjeteve që mund të pajisen me sinjale të tilla. Në këtë kategori përfshihen mjetet në shërbim të policisë, zjarrfikësve dhe autoambulancave, ndërsa statusi i deputetit nuk përbën në vetvete një autorizim për përdorimin e sinjaleve speciale.
Për këtë arsye, Policia Rrugore duhet të verifikojë nëse pajisja e fotografuar është një sinjalizues i parashikuar nga neni 175, nëse automjeti është i autorizuar për ta mbajtur dhe nëse pajisja është përdorur gjatë qarkullimit.
Nëse nga verifikimi konstatohet përdorim i një sistemi të tillë në kundërshtim me Kodin Rrugor, atëherë masa administrative duhet të jetë e njëjtë si për çdo drejtues tjetër automjeti, pavarësisht funksionit që mban.
Deputete apo qytetar i zakonshëm, rregullat e qarkullimit rrugor duhet të zbatohen njësoj.