Prezantuesja televizive egjiptiane Sarah Khalifa është dënuar me vdekje në një nga rastet më të mëdha të drogës në vend. Një gjykatë në Kajro ka dënuar prezantuesen 39-vjeçare dhe 11 të pandehur të tjerë me vdekje me varje, pasi i ka gjetur fajtorë për formimin e një grupi të organizuar kriminal për prodhimin dhe trafikimin e drogës.
Vendimi ka të bëjë me një rast që mediat egjiptiane e kanë përshkruar si një “rast të madh droge”, ndërsa vendimi përfundimtar u dha pas procesit të konsultimit me Myftiun e Madh të Egjiptit, siç kërkohet në rastet e dënimit me vdekje në vend.
Sipas aktakuzës, Khalifa dhe të pandehurit e tjerë akuzoheshin për krijimin e një rrjeti për të furnizuar materiale të përdorura në prodhimin e drogave sintetike me qëllim trafikimin e tyre.
Autoritetet pretendojnë se gjatë hetimeve u sekuestruan më shumë se 750 kilogramë substanca narkotike dhe lëndë të para, ndërsa u gjetën edhe hapësira që dyshohet se përdoren si laboratorë, si dhe armë dhe municione pa licencë.
Sarah Khalifa u bë e njohur për publikun egjiptian përmes shfaqjes “Mission Impossible”, e cila përqendrohej në çështjet e sigurisë dhe krimit.
Përveç karrierës së saj televizive, ajo drejtonte edhe një klinikë të kirurgjisë kozmetike dhe një kompani prodhimi eventesh.
Ajo i mohoi akuzat, duke pretenduar se nuk kishte të bënte fare me drogën dhe se i pa për herë të parë ato kur autoritetet i treguan fotot e tyre.