Ka nisur në të gjithë Shqipërinë nisma e re e Partisë Socialiste, e pagëzuar “Prania Besnike”, e cila do të zhvillohet çdo të premte, në të njëjtën orë dhe në të njëjtat ambiente. Qëllimi i deklaruar është që deputetët dhe drejtuesit socialistë të takojnë banorët, të dëgjojnë shqetësimet e tyre dhe të evidentojnë problematikat dhe shërbimet që mungojnë në zonat ku ata jetojnë.
Nisma u prezantua nga kryeministri Edi Rama gjatë mbledhjes së grupit parlamentar të Partisë Socialiste. Rama kërkoi që takimet të zhvillohen ballë për ballë, pa kamera, ndërsa u kërkoi deputetëve dhe socialistëve që të mbanin shënime për shqetësimet e qytetarëve dhe, siç u shpreh ai, të shënonin se “çfarë robi i Zotit po flet”.
Por në ditën e parë të “Pranisë Besnike”, një detaj i vënë re në takimin e deputetes së PS-së për Qarkun e Elbasanit, Sara Mila, ka tërhequr vëmendjen.
Mila, pas takimit me banorët në fshatin Papër, u shfaq me një bllok shënimesh në dorë dhe deklaroi se qytetarët kishin ngritur shqetësimet e tyre dhe se ajo i kishte shënuar të gjitha.
Megjithatë, teksa deputetja shfleton bllokun para kamerës, faqet që duken në pamje shfaqen të pastra dhe pa shënime.
Pavarësisht këtij detaji, Mila deklaroi se takimet nuk përfundojnë me ditën e parë dhe se “Prania Besnike” do të vijojë me kontakte të tjera me banorët.
Nisma e PS-së synon të shtrihet në të gjithë territorin e vendit dhe, sipas deklaratës së Ramës, të vijojë për sa kohë ai do të jetë në drejtimin e Partisë Socialiste