Kompania NET Group, e cila ishte në pronësi të Valter Begajt, mikut të Evis Berberit, është duke vijuar normalisht aktivitetin e saj, pavarësisht se po gjykohet në GJKKO si pjesë e dosjes korruptive të ish-kreut të ARRSH.
Bashkia e Kamzës e ka shpallur fituese shoqërinë NET Group, që aktualisht është në pronësi të shtetases Loreta Vallja, të një tenderi me vlerë rreth 60 mijë euro. Bëhet fjalë për tenderin me objekt: Hartim Analize e Detyrës së Projektimit, Projekt-Ideja, Projekt Zbatim, Preventiv Përfundimtar, “Ndërtim Qendër Shëndetësore, Kamëz”.
Në garë kanë marrë pjesë disa operatorë ekonomikë, ndërsa janë skualifikuar edhe ata me ofertën ekonomike më të ulët, siç është rasti i shoqërive INFRATECH apo DERBI-E.
Sikur të mos mjaftonte skualifikimi i operatorëve ekonomikë me ofertë më të ulët se fituesi, Bashkia e Kamzës, që drejtohet nga Rakip Suli, ka “shpikur” një ekstraprocedurë për të shpallur fitues NET Group.
Sipas dokumenteve të tenderit, shoqëria që dikur bënte transaksionet e fondeve publike në llogaritë e kompanisë së Evis Berberit i është nënshtruar procedurës së shortit me kompaninë GRAMA, me të cilën çuditërisht është futur në garë me të njëjtën vlerë të ofertës ekonomike për këtë tender, konkretisht: Vlera 5.368.000 (pesë milionë e treqind e gjashtëdhjetë e tetë mijë) lekë pa TVSH. Nga shorti, ka rezultuar fitues pikërisht kompania NET Group për tenderin e projektimit të Qendrës Shëndetësore të Kamzës.
Në qershor të vitit 2025, SPAK mbylli hetimet për ish-kreun e ARRSH-së, Evis Berberi, duke dërguar dosjen për gjykim për akuza të rënda penale si: korrupsioni, pastrimi i parave, etj. Në gjykim u dërguan edhe dy kompanitë, NET Group dhe DAAM sh.p.k., të cilat ishin përdorur nga Evis Berberi për të përvetësuar fondet publike.
Konkretisht, Evis Berberi firmoste tendera për kompaninë e mikut të tij, Valter Begaj, NET Group, dhe më pas Begaj transferonte nëpërmjet kësaj kompanie paratë te kompania DAAM, që ishte në pronësi të Evis Berberit. Sipas SPAK, është vërtetuar që nëpërmjet dy kompanive janë kryer disa herë transaksione financiare, ndërsa ish-kreu i ARRSH-së ka tërhequr dhjetëra mijëra euro cash nga llogaritë e shoqërisë DAAM sh.p.k.