Tetë vite pasi humbi çdo kontakt me familjen, 24-vjeçari Elvis Troqe është shpallur zyrtarisht i zhdukur nga Gjykata e Shkallës së Parë e Juridiksionit të Përgjithshëm Vlorë.
Vendimi është marrë më 15 qershor 2026 dhe është publikuar në Fletoren Zyrtare. Gjykata ka caktuar nënën e të riut, Marsela Troqe, si kujdestare për administrimin e pasurisë së tij, të luajtshme dhe të paluajtshme.
Zhdukja e Elvis Troqes daton më 17 korrik 2018. Atë mbrëmje, 24-vjeçari ishte larguar nga banesa dhe nuk u kthye më. Në atë periudhë, ai sapo ishte rikthyer nga Italia, ku kishte vuajtur një dënim për trafikim të lëndëve narkotike.
Babai i tij ka treguar për mediat se djali i kishte thënë se do të dilte për pak kohë dhe se kishte një surprizë për familjen. Sipas tij, Elvisi kishte përmendur edhe mundësinë e një fejese me një vajzë që, siç i kishte thënë, kishte njohur.
Por ajo që nisi si një dalje e zakonshme u kthye në një mister që vazhdon prej vitesh. Të dhënat e mbledhura gjatë hetimeve treguan se i riu ishte parë pranë një automjeti “Mercedes-Benz”, ngjyrë gri. Ai kishte përshëndetur personin që ndodhej në timon dhe më pas ishte futur në makinë. Në automjet, sipas të dhënave të bëra publike, ndodheshin edhe dy persona të tjerë.
Pas hipjes në automjet, nuk pati më asnjë gjurmë të 24-vjeçarit.
Pista e një largimi të vullnetshëm u vu në pikëpyetje nga hetimet. Në atë kohë, Prokuroria e Vlorës bëri me dije se në materialet e administruara kishte elementë që lidhnin ngjarjen me veprën penale të rrëmbimit të personit.
Për zbardhjen e rrethanave të zhdukjes u kryen një sërë veprimesh hetimore. Mes tyre ishin edhe kontrollet në banesën e Inez Hajrullës, i cili, sipas deklarimeve të tij, atë pasdite kishte dalë për të kryer fizioterapi dhe nuk kishte pasur njohje me Elvis Troqen.
Ndërsa koha ka kaluar dhe hetimi nuk ka dhënë ende një përgjigje përfundimtare mbi fatin e tij, gjykata ka marrë tashmë vendimin për ta shpallur Elvis Troqen zyrtarisht të zhdukur. Për familjen, megjithatë, tetë vite më pas mbetet ende e njëjta pyetje: çfarë ndodhi me 24-vjeçarin pasi hipi në atë automjet mbrëmjen e 17 korrikut 2018?
