Përplasjet brenda Partisë Socialiste në Qarkun e Gjirokastrës duket se kanë marrë një tjetër dimension. Në mbledhjen e fundit me deputetët dhe kryebashkiakët e qarkut, tensionet janë shfaqur hapur mes deputetit Tërmet Peçi dhe drejtueses politike të qarkut, Mirela Kumbaro.
Sipas burimeve, Peçi ka ngritur sërish shqetësimin për situatën e socialistëve në Tepelenë, duke pretenduar se një pjesë e njerëzve që kanë kontribuar për Partinë Socialiste kanë mbetur jashtë strukturave dhe vendeve të punës.
Kjo nuk është përplasja e parë mes dy figurave socialiste. Marrëdhëniet mes Peçit dhe Kumbaros janë tensionuar prej kohësh, veçanërisht pas vendimit të ish-kryebashkiakut të Tepelenës për të hyrë në garën për deputet.
Në prapaskenë, përplasja duket se lidhet edhe me peshën politike që secili kërkon të ketë në Qarkun e Gjirokastrës. Peçi, pas daljes nga drejtimi i bashkisë dhe kalimit në Parlament, ka tentuar të ruajë dhe të zgjerojë ndikimin e tij politik në Tepelenë, ndërsa Kumbaro vijon të jetë figura që drejton politikisht qarkun.
Gjatë fushatës elektorale, sipas burimeve, mes tyre ka pasur përplasje të vazhdueshme, ndërsa tashmë konflikti duket se është zhvendosur brenda strukturave të PS-së.
Peçi ka kundërshtuar në mënyrë të përsëritur mënyrën se si janë trajtuar mbështetësit e tij, ndërsa në muajt e fundit disa persona të afërt me ish-kryebashkiakun janë larguar nga detyrat që mbanin.
Përplasja mes dy socialistëve nuk duket thjesht si një debat për punësimet. Ajo lidhet me një betejë më të gjerë për kontrollin dhe ndikimin politik në Qarkun e Gjirokastrës, ku Peçi dhe Kumbaro tashmë përfaqësojnë dy qasje të ndryshme brenda së njëjtës forcë politike.
Dhe nëse tensionet do të vijojnë, beteja mes tyre pritet të bëhet edhe më e dukshme në strukturat lokale të Partisë Socialiste.