Virusi i Nilit Perëndimor po shënon një përhapje të fortë në Greqinë fqinje, ku autoritetet shëndetësore kanë raportuar 232 raste të infektimit dhe 19 viktima gjatë sezonit të transmetimit të vitit 2026.
Vetëm gjatë javës që përfundoi më 26 gusht janë diagnostikuar 75 raste të reja, duke treguar një rritje të ndjeshme të infeksioneve. Sipas të dhënave të Organizatës Kombëtare të Shëndetit Publik të Greqisë, përmasat e shpërthimit janë pothuajse tri herë më të mëdha se në të njëjtën periudhë të vitit të kaluar.
Nga 232 personat e konfirmuar me virus, 165 kanë zhvilluar komplikacione në sistemin nervor qendror, përfshirë encefalitin, meningjitin ose paralizën akute, ndërsa 67 të tjerë kanë pasur simptoma më të lehta ose nuk kanë shfaqur komplikacione neurologjike.
Të 19 viktimat ishin mbi 65 vjeç, me moshë nga 66 deri në 92 vjeç dhe një moshë mesatare prej 85 vjeç. Aktualisht, 89 pacientë vazhdojnë të jenë të shtruar në spital.
Autoritetet greke paralajmërojnë se situata mund të përkeqësohet. Kulmi i valës së infektimeve pritet brenda një ose dy javëve të ardhshme, ndërsa raste të reja mund të vazhdojnë të shfaqen të paktën deri në fund të shtatorit.
Një pjesë e konsiderueshme e infektimeve është regjistruar në rajonin e Atikës, ku bashkitë kanë intensifikuar masat kundër mushkonjave, përfshirë spërkatjet, vendosjen e kurtheve dhe monitorimin e zonave me rrezik më të lartë.
Virusi i Nilit Perëndimor transmetohet te njerëzit kryesisht përmes pickimit të mushkonjave të infektuara. Për këtë arsye, autoritetet shëndetësore greke u kanë kërkuar qytetarëve, veçanërisht të moshuarve, të vazhdojnë masat mbrojtëse ndaj mushkonjave edhe gjatë vjeshtës.