Kryetari i Partisë Demokratike, Sali Berisha, ka komentuar largimin e disa ish-zyrtarëve të selisë blu, të cilët i janë bashkuar mazhorancës socialiste duke marrë pozicione drejtuese.
I pyetur për lëvizjen e fundit të Jola Hysajt dhe ish-zyrtarëve të tjerë demokratë, Berisha u shpreh se është “fatkeqësi” që ata kanë qenë pjesë e ekipit të tij.
“Është fatkeqësi që kanë qenë pranë meje ata. Të bashkohesh me Edi Ramën, të bashkohesh me një armik të egër të ekzistencës së kombit shqiptar, shkelmon mbi vetë substancën!”, tha Berisha.
Gjithashtu Berisha u shpreh se primare për të mbetet përballja me pushtetin aktual.
“Ato i ka në dorë i Gjithëfuqishmi. E rëndësishme është të bëj gjithçka që të shpëtoj shqiptarët nga kjo narko-diktaturë,” deklaroi kryedemokrati.
Nder te tjera Berisha u përgjigj me optimizëm, duke përdorur edhe shprehje popullore të Tiranës.
“Vitet janë numra, mund t’i pjesëtosh për dy. Por tironsit e kanë një fjalë, një mençuri që vjen nga lashtësia: ‘Robi plaket kur don vet’. I garantoj shqiptarët se në momentin e parë kur të konstatoj se mosha më pengon detyrimet e mia, do t’u them ‘mirupafshim’,” u shpreh prerë lideri i opozitës