Balfin Group, grupi i biznesit i themeluar nga miliarderi shqiptar Samir Mane, po interesohet për disa prej pronave tregtare që kanë mbetur nga perandoria e Signa-s. Pas ish-Tietz-Kaufhaus në Mynih, në fokus janë tashmë dy ndërtesa të Galeria-s në Hannover dhe Bonn.
Sipas kërkimeve të revistës gjermane Immobilien Zeitung, bëhet fjalë për ndërtesën e Galeria-s në Ernst-August-Platz 5 në Hannover dhe atë në Remigiusstraße 20 në Bonn.
Lëvizja vjen pas interesimit të Balfin për Tietz-Kaufhaus në Mynih, një tjetër pronë e rëndësishme tregtare e lidhur me portofolin e ish-Signa-s. Grupi i Samir Manes po shfaq kështu një interes në rritje për pasuritë e paluajtshme tregtare në tregun gjerman.
Signa, grupi i themeluar nga René Benko, u përball me një krizë financiare që çoi në falimentimin e kompanive kryesore të tij dhe në shitjen e një pjese të konsiderueshme të portofolit të pasurive të paluajtshme.Mes aseteve të grupit ishin disa prej ndërtesave më të njohura të shitjeve me pakicë në qytetet gjermane. Pas ristrukturimit dhe proceseve të shitjes, këto prona kanë tërhequr interesin e investitorëve të rinj.
Për Balfin, interesi për këto asete përfaqëson një tjetër hap në zgjerimin e aktivitetit ndërkombëtar në pasuritë e paluajtshme.
Nëse transaksionet në Hannover dhe Bonn finalizohen, Balfin do të shtojë në portofolin e tij dy prona të rëndësishme në qendra urbane gjermane.
Balfin Group është një nga grupet më të mëdha shqiptare të biznesit dhe operon në disa sektorë, përfshirë pasuritë e paluajtshme, retail-in, turizmin dhe industrinë.
Zgjerimi në Gjermani e vendos grupin përballë një prej tregjeve më të mëdha të Evropës.