Një tjetër sukses i rëndësishëm për sportin shqiptar vjen nga Kampionati Botëror i IFMA-së, i zhvilluar në Deçan të Republikës së Kosovës, ku sportistët shqiptarë kanë arritur rezultate të jashtëzakonshme.
Në qendër të këtij suksesi është Firdeus Demiraj, i cili është shpallur kampion bote në kategorinë U24 MT, në peshën 86 kg. Demiraj ka siguruar gjithashtu vendin e tretë në kategorinë U24 Ring, në peshën 81 kg, duke u ngjitur dy herë në podiumin e një prej kompeticioneve më të rëndësishme ndërkombëtare.
Në total, ekipi shqiptar ka regjistruar një paraqitje historike, duke siguruar 18 medalje në Kampionatin Botëror të IFMA-së dhe duke nderuar Shqipërinë në arenën ndërkombëtare.
Ky rezultat vjen si pasojë e punës, përkushtimit dhe përgatitjes së vazhdueshme të sportistëve shqiptarë, por një sukses i tillë ngre edhe nevojën për një mbështetje më të madhe institucionale ndaj tyre. Rezultatet e arritura në arenën botërore janë një tregues i qartë se sportistët shqiptarë kanë potencial për të vijuar të konkurrojnë në nivelet më të larta, nëse marrin mbështetjen e nevojshme financiare dhe organizative.
Për Firdeus Demirajn, ky triumf ka edhe një vlerë të veçantë familjare. Ai po vijon traditën e familjes Demiraj, e cila ndër vite i ka dhënë Shqipërisë sportistë të suksesshëm në disiplinat e arteve marciale.
Një rol të rëndësishëm në këtë sukses i atribuohet edhe Arbis Vjerdhës, mjeshtër dhe kampion i Kick Box-it, i cili ka kontribuar me pasionin dhe profesionalizmin e tij në përgatitjen dhe zhvillimin e sportistëve.
