Një shqiptar është në qendër të vëmendjes së mediave rozë në Amerikën Latine, pasi është bërë partneri i ri i moderatores dhe figurës së njohur televizive venezueliane Carolina Sandoval.
Bëhet fjalë për Niko Topuzin, një biznesmen shqiptar që jeton dhe ushtron aktivitetin e tij në Santorini, ku zotëron biznese në sektorin e hotelerisë dhe restoranteve.
Lidhja e tij me Sandovalin është bërë publike së fundmi, ndërsa moderatorja ka folur hapur për këtë kapitull të ri në jetën e saj sentimentale.
“Sot festoj mundësinë për të buzëqeshur përsëri, për të ndjerë shpresë dhe për t’i lejuar vetes të jem e lumtur”, është shprehur Sandoval për People en Español, duke konfirmuar se është e dashuruar.
Historia mes shqiptarit dhe moderatores venezueliane nisi gjatë pushimeve. Fillimisht, një mik i përbashkët i prezantoi përmes një videoje, ndërsa më pas ata patën mundësinë të takoheshin personalisht gjatë një udhëtimi.
Një tjetër detaj që ka tërhequr vëmendjen është lidhja e veçantë e Niko Topuzit me Venezuelën. Edhe pse shqiptar me origjinë dhe me jetën e tij të lidhur me Greqinë, ai flet spanjisht në mënyrë të përsosur dhe ka shfaqur një afërsi të veçantë me kulturën venezueliane. Madje, sipas mediave, ai di edhe të përgatisë arepa, një prej ushqimeve më të njohura të Venezuelës.
Çifti aktualisht po përjeton një lidhje në distancë, pasi aktivitetet dhe angazhimet e tyre i mbajnë në vende të ndryshme. Megjithatë, kjo nuk i ka penguar që ta bëjnë publike romancën dhe të shfaqen së bashku.
Për shqiptarin Niko Topuzi, kjo histori dashurie ka sjellë edhe një vëmendje të re në mediat ndërkombëtare, duke e vendosur emrin e tij përkrah një prej figurave të njohura të televizionit venezuelian.