Shqipëria po përshpejton procedurat për pajisjen e shtetasve të huaj me leje qëndrimi dhe leje unike pune.
Udhëzimi i ri i përbashkët i Ministrisë së Brendshme, Ministrisë së Ekonomisë dhe SHISH-it përcakton afate të qarta për çdo fazë të shqyrtimit. Aplikimi do të bëhet online në e-Albania nga i huaji, punëdhënësi ose një agjenci e licencuar punësimi.
Pas pranimit të dosjes, aplikanti mund të pajiset me leje provizore elektronike brenda një dite pune. Të dhënat do të shkëmbehen automatikisht mes sistemeve të migracionit, punësimit dhe vizave, duke shmangur përcjelljen manuale të dokumenteve.
SHISH-i dhe Policia Kriminale do të vijojnë të kryejnë kontrollet e sigurisë për çdo aplikant. Verifikimet duhet të përfundojnë brenda pesë ditëve pune për lejen unike dhe shtatë ditëve për lejen e qëndrimit.
Pas marrjes së përgjigjeve, strukturat e migracionit kanë tri ditë pune për të marrë vendimin dhe dy ditë të tjera për të njoftuar aplikantin.
Për dokumentet e paplota jepet një javë afat në rastin e lejes unike dhe deri në 30 ditë për lejen e qëndrimit.
Procedura e re nuk heq filtrat e sigurisë, por shkurton pritjet dhe detyron institucionet të përgjigjen brenda afateve.
Ndryshimet vijnë në një kohë kur bizneset shqiptare po mbështeten gjithnjë e më shumë te punonjësit e huaj për të plotësuar mungesat në tregun e punës.